Get the latest news at
your fingertips!
Download our app now
LIVE TV
Search
ആലപ്പുഴ: ഗൂഗിള്‍ പേ വഴി കൈക്കൂലി വാങ്ങിയ വില്ലേജ് ഓഫീസര്‍ അറസ്റ്റില്‍. കൃഷി ആനുകൂല്യം ലഭിക്കുന്നതിന് പഴയ സര്‍വ്വേ നമ്പര്‍ ആവശ്യപ്പെട്ടയാളില്‍ നിന്ന് ഗൂഗിള്‍ പേ വഴി ആയിരം രൂപ കൈക്കൂലി വാങ്ങിയതിന് ഹരിപ്പാട് വില്ലേജ് ഓഫീസര്‍ പി കെ പ്രീതയെയാണ് വിജിലന്‍സ് പിടികൂടിയത്.
കേന്ദ്രസര്‍ക്കാരിന്റെ അഗ്രി സ്റ്റാക്ക് പോര്‍ട്ടലില്‍ രജിസ്റ്റര്‍ ചെയ്യുന്നതിനായാണ് പരാതിക്കാരന്‍ വസ്തുവിന്റെ പഴയ സര്‍വേ നമ്പര്‍ ആവശ്യപ്പെട്ട് വില്ലേജ് ഓഫീസറെ സമീപിച്ചത്. പി കെ പ്രീതയുടെ ഔദ്യോഗിക ഫോണിലേക്കാണ് വിളിച്ചത്. അപ്പോള്‍ തിരക്കാണെന്ന് പറഞ്ഞ് അടുത്ത ദിവസം വിളിക്കാന്‍ ആവശ്യപ്പെടുകയായിരുന്നു.
പിറ്റേന്ന് പരാതിക്കാരന്‍ വില്ലേജ് ഓഫീസറെ വിളിച്ചപ്പോള്‍ വസ്തുവിന്റെ വിവരം വാട്ട്‌സാപ്പിലൂടെ അയക്കാന്‍ പറയുകയും സര്‍വേ നമ്പര്‍ നല്‍കണമെങ്കില്‍ ഫീസ് അടയ്ക്കണം, തുക വാട്ട്‌സാപ്പ് വഴി അറിയിക്കാമെന്ന് പറയുകയും ചെയ്തു. ഗൂഗിള്‍ പേ നമ്പര്‍ നല്‍കി അതിലേക്ക് ആയിരം രൂപ അയക്കാനാണ് വില്ലേജ് ഓഫീസര്‍ ആവശ്യപ്പെട്ടത്.
ഇതോടെ പരാതിക്കാരന്‍ ആലപ്പുഴ വിജിലന്‍സ് ഡിവൈഎസ്പിയെ വിവരം അറിയിച്ചു. വിജിലന്‍സ് സംഘം സ്ഥലത്തെത്തി. വില്ലേജ് ഓഫീസര്‍ ഗൂഗിള്‍ പേ വഴി പണം കൈപ്പറ്റിയതിനു പിന്നാലെ രണ്ടുമണിയോടെ വില്ലേജ് ഓഫീസിന് സമീപമുളള പാര്‍ക്കിലെ ഗ്രൗണ്ടില്‍ നിന്നും പ്രതിയെ പിടികൂടി. പിന്നീട് കോട്ടയം വിജിലന്‍സ് കോടതിയില്‍ ഹാജരാക്കി.
Content Highlights: Village officer arrested for accepting a bribe of Rs. 1,000 through Google Pay
